index introductio imagines || partitura exemplar translatio

bibliographia e-mail

CTH 396.1.1

Exemplar --

Citatio: A. Chrzanowska (ed.), hethiter.net/: CTH 396.1.1 (Expl. --, 10.05.2012)

§ 1

1 -- UMMA fḪatiya MUNUS URUKanzapida

2 -- mān [antuḫši … ] kišari

3 -- nu SÍSKUR DWišuriyanda[š šipandaḫḫi]

4 -- nu kī daḫḫi

5 -- 3 NINDA ān ŠA 1/2 ŠĀTI [ ... ] 1 DUG KAŠ 1 DUGKUKUB GEŠTIN 1 DUGKUKUB KAŠ 1 GIŠBANŠUR AD.KI[D … ]

§ 2

6 -- nu=ššan DWišuriyandan katta [ÍD-i pēdaḫḫi]

7 -- nu=ššan paimi

8 -- ANA PĀNI ÍD GIŠZA.LAM.G[AR tarnaḫḫ]i

9 -- nu DWišuriyandan wappuwaš [IM-it šu]warūitt=a warapmi

10 -- nu kiššan temi

11 -- kāš[a=wa=a]tta parkununun

12 -- nu=wa=atta [ … ] šappišaraḫḫun

13 -- [zi]g=a DWišuriyanza ANA EN SÍS[KUR E]GIR-pa TI-tar ḫaddulātar in[na]rawatar MUḪI.A GÍD.DA [IG]IḪI.A-waš u[škiyawa]r GÚ-tar šarā appātar=a piški

§ 3

14 -- [nu māḫḫan DINGIR-LAM] warpuwanzi zinnaḫḫi

15 -- nu 1 NINDA.GUR4.RA ZÌ.DA ZÍZ UPNI [1 NINDA.GUR4.RA GA.KIN.A]G TUR 1 NINDA.GUR4.RA GIŠPÈŠ paršiyami

16 -- anda=ma=kan kiššan memaḫḫi

17 -- nakkīš DINGIR-LUM zik azzikkī

18 -- [ÍDḪI.A-wa ... a]rmizziyandaru

19 -- ḫarēš=ma=wa=kan [ … ]-ru

20 -- ḪUR.SAGḪI.A=ma=wa laḫḫurnuzzi katta appandu

21 -- [ ... ]-x-[ … ] KU6 daḫḫi

22 -- nu=šši=kan KAxU-i anda NINDA.Ì.E.DÉ.A teḫḫi

23 -- [namm]a=an [ÍD-i EGIR]-an tarnaḫḫi

24 -- nu=kan anda kiššan memaḫḫi

25 -- īt=wa=[ ... ] URU-ri ḪUR.SAGŠuppinna ÍDZippira=ia

26 -- nu=wa kū[n … ].A ANA DWišuriyanti pēda

§ 4

27 -- nu wappu[i pira]n katta 3 AŠRA paddaḫḫi

28 -- nu [1 NINDA.GU]R4.RA ZÌ.DA ZÍZ UPNI 1 NINDA.GUR4.RA GI[ŠPÈŠ 1 NINDA.GUR4.RA] GA.KIN.AG TUR DG[ulš]aš DMAḪ=ia paršiyami

29 -- nu=kan anda [kiššan] memaḫḫi

30 -- kāša=wa=šmaš EN SÍSKUR SÍSKUR paiš

31 -- šumeš=a=wa [DGulšaš DM]AḪMEŠ ANA EN SÍSKUR TI-tar ḫaddulātar [i]nnaraw[atar MUḪI.A GÌD.DA IG]IḪI.A-aš uškiyawar GÚ-tar šarā appātar=a [IN]A EGIR [UD-MI piškatten]

§ 5

32 -- [ … -m]a=an24 x-[ … ]

33 -- nu=ššan ÍD-i piran 1 GUNNI iyam[i]

34 -- [ … ]x-an[ … ]

35 -- n=ašta ANA KU6 KAxU-i anda NINDA.Ì[.E.DÉ.A teḫḫi]

36 -- [n]=a[n=šan ḫaššī pešš]iyami

37 -- n=an warnumi

38 -- tuḫ[ḫuwaiš=ma] UL ku[iški]

39 -- [nu 1 NINDA.GUR4.]RA ZÌ.DA ZÍZ 1 NINDA.GUR4.RA GIŠP[ÈŠ 1 NINDA.GUR4.RA GA.KIN.AG TUR parš]iyami

40 -- n=aš=šan ḫaššī peššiyami

41 -- nu [māḫḫan paḫḫ]ur katta išari

42 -- n=a[šta? … ] IŠTU DUGKUKUB G[EŠTIN? an]da gulašmi

§ 6

43 -- nu 1 NINDA.GUR4.RA ZÌ.DA ZÍZ 1 NINDA.GUR4.[RA] GIŠPÈŠ 1 NINDA.GUR4.RA GA.KIN.AG TUR=ia ANA DUTU ŠAMÊ paršiy[a]mi

44 -- n=ašta anda kiššan memaḫḫi

45 -- kāša=wa ANA DWi[š]uriyanti ḫuwappi MUNUS-ni SÍSKUR peškimi

46 -- nu=za z[i]k DUTU-uš kutruwaš ēš

47 -- uizzi=at

48 -- ša[nnai ku]watqa

49 -- n=at EGIR-an zik nepi[šaš DUTU-uš] šāk

50 -- [nu m]āḫḫa[n zinnaḫ]ḫi

51 -- n=ašta apē[z … pē]daz [ … ]

§ 7

52 -- nu=ššan [ANA PĀNI DGulšaš] DMAḪ kuiēš 3 NINDA.GUR4.RA ANA GIŠBANŠUR AD.KI[D tiyanteš]

53 -- nu=ššan DINGIR-LUM šer apiy[a] ašašḫi

54 -- tamauš=m[a NINDA.GUR4.RAḪI.]A ANA DWišuriyanti parš[iyami]

55 -- n=aš=šan ANA GIŠBAN[ŠUR AD.KID] ANA PĀNI DINGIR-LIM teḫḫi

56 -- nu DUMU.É.GAL kuiš kat[ta aša]nza

57 -- n=ašta 1 UDU ANA DUTU ŠAMÊ ši[panti]

58 -- nu UZUNÍG.GIG UZUŠÀ IZI-[it za]nuanzi

59 -- maḫḫan=ma=at zeari

60 -- nu 3 NINDA.GUR4.RAḪI.A ANA DUTU [par]šiyami

61 -- šēr=a=aš=šan UZUNÍG.GIG UZUŠÀ kuirzi dāi

62 -- nu EGIR-anda KAŠ 3-ŠU šipanti

§ 8

63 -- EGIR=ŠU=ma ANA DI[M] 3 NINDA.GUR4.RAḪI.A paršiya

64 -- EGIR=ŠU=ma ANA D[ … 3] NINDA.GUR4.RAḪI.A paršiya

65 -- EGIR=ŠU=ma D[Gulšaš D]MAḪ-ni 3 NINDA.GUR4.RAḪI.A paršiya

66 -- EGIR=ŠU=ma KAŠ [3-ŠU] šipanti

§ 9

67 -- [ … ]=kan m[arakzi]

68 -- maḫḫan=ma=aš zear[i]

69 -- nu=za adan[na ešari]

70 -- [nu] akuwanna [w]ēkzi

71 -- nu GAL<DUMU>.É.GAL š[ip]anza[kizzi]

72 -- nu ḫantezz[i pa]lši DUTU ŠAMÊ ekuz[i]

73 -- EGIR=ŠU=ma AN[A DI]M ekuzi

74 -- EGIR=ŠU=ma A[NA D … ] ekuzi

75 -- akkuškiuwani=ma TUŠ-aš [ … ]

§ 10

76 -- nu ḫaštāe [šarā] liššanzi

77 -- n=at ḫaššī awan katta tianzi

78 -- nu=kan arḫ[a … ]-zi

79 -- nu ḫaštāe warnuwanzi

80 -- maḫḫan=[ma paḫḫur katta] ešari

81 -- n=at=kan araḫza[nda IŠTU KAŠ gul]ašzi

82 -- namma=kan NINDA ÉRINMEŠ [ … ]-x-x-[ … ]

83 -- [ ... ] ammuk daḫḫi

84 -- nu DINGIR-LUM Ékarimmi [EGIR-pa paizzi]

85 -- nu māḫḫan DINGIR-LUM KÁ-aš ari

86 -- nu EN SÍSKUR [ANA DINGIR-LIM a]nda UŠKĒN

87 -- nu KAŠ šipanti

88 -- n=ašta DINGIR-LAM [Ékarimmi] anda [pēd]aḫḫi

89 -- kuit=ši AŠRU

90 -- [namma 3 NINDA.GUR4.RAḪI.]A ŠÀ-BA 1 [NINDA.GUR4.R]A ZÌ.DA ZÍZ 1 NINDA.GUR4.RA GA.KIN.AG TUR [1 NINDA.GUR4.RA GIŠPÈŠ ḫarp]anzi

91 -- nu=ššan DINGIR-LUM katta paškanzi

§ 11

92 -- [UNŪT GIR4] UNŪT AD.KID kuit ANA SÍSKUR ḫarmi

93 -- [n=at=za am]muk daḫḫi

94 -- EN SÍSKUR-za EGIR-pa UL kuitki dāi

§ 12

94 -- DUB.1.KAM QATI

95 -- AWĀT fḪatiya MUNUS URUKanzapida

96 -- mān antuḫši DWišūriandan šipandaḫḫi